المعاناة ديالي مع هاد الزوج ساعدوووني بزاف ديما صداع مرضني

المعاناة ديالي مع هاد الزوج ساعدوووني بزاف ديما صداع مرضني

 

واحد الصديقة ديالي هيا الي دلاتني على هاد الموقع الله يجازيها بالخيرباش نحكيلكم المعاناة ديالي مع راجلي انا كنت عايشة هانية فدارنا مخاصني حتا خير مكنتش كنعرف اشنو هما المشاكل كنت كنشاطي بزااااف وكنلقى غير ولاد الحرام حتا كرهت الرجال ومجا منهم كنلقا هدفهم واحد وهي التفلية واحد النهار هضرت مع واحد السيد الي هو دابا راجلي ولقيتو كيهدر معايا باحترام وادب وعطيتو رقم الهاتف ديالي وجا عندي وتلاقينا فاش شافني عجبتو ولصقني قاليا نتي هيا البنت الي بغيت وكنت كنقلب عليها وطلب مني الزواج انا تفاجات من هدرتو حيت يالاه شافني انا متقتش بيه مشيت بحالي لدارنا وهو يتاصل بيا قالي واش تقبلي تزوجي بيا قلت ليه حتا نتعارفو مزيان وديك ساعة يكون خير معلينا بقينا كنهدرو عبر الهاتف عجباتني عقليتو ومثقف وحتا تفكيرنا كان بحال بحال غير هوا عاد كان بادي حياتو يعني مجامع لفلوس لا والو باش يتزوج تسلف تكاليف ديال عرسنا من عند امو ودابا كردليها بشوية بشوية دازت 10 ايام قالي راه غدا جايين نهدرو فيك جاية الواليدة وخوتي قلت ليه مرحبا بيكم وعلمت دارنا وخا زرب عليا داز داكشي مزيان تافقنا على الخطوبة فاش خطبني بقيت كنخرج معاه تقريبا يوميا وكيشري لبغيت يكسيني يساريني لبورتابل لي عجبني كيقوليا خوديه صراحة تعلقت بيه بزاف دار ليا البيرمي وبقا كيخليلي السيارة ديالو كيقولي دربي فيها وهو كيمشي فالطاكسيات للخدمة مخلا مدار معايا كنت كنقول هدا هو الراجل صافي جا موعد العقد درنا العقد والعرس وداز كلشي مزيان عشت معاه واحد السعادة معمري ظنيت غادي نعيشها الخطا الي درت انني حملت من اول شهر ديال زواجنا وداز عليا الوحم صعيب حيت تبدلت ومبقيتش هاديك البنت الي كان كيحلم بيها مبقيش كنمشط حتا شعري وليت بحال الغولة انا كنشوف فالمراية وكنبكي مرضت واحد المرضة خايبة هو صبر معايا مكنتش كنقدر نطيب او نخمل داري مكنكل مكنشرب عشت فواحد العالم اخر تعزلت عليه كان كيجي من الخدمة كنقوليه مباغاش نشوفك وهو صابر وساكت حتى الحقوق ديالو مكنعطهمش ليه ولكن ماشي لخاطري وخا هكداك قبل مكيمشي الخدمة كنكون انا ناعسة وكيجي يبوس ليا راسي وكيمشي كان كيغسل ليا رجلي ويدوش ليا ونبقا نتنفخ عليه ونغوت وانا محساش براسي اش كندير صافي هو عيا تقهر 5 شهور ديال العداب فاش بدا كيفوتني الوحم بديت كنرجع لحياتي العادية كنطيب مرة مرة كنتهلى فراسي وليت كندير المكياج نلبس نخرج انا وياه ولكن هو بحالي تغير شوية ولى عصبي يمكن داكشي الي دوزت عليه خلاه عدواني يدابز فالخدمة وفالزنقة من بعد ثقلت بزااف ومبقيتش كنقدر ندير والو وطلبت منو نمشي لدارنا مبغاش قاليا متخلينيش بحدي ولفتك بقيت كنرغبو وكنقولو شوف حالتي عاد وافق وخلاني مشيت لدارنا ولدت ودرنا السبوع فدارنا ورجعت انا وولدي لعند راجلي كان فرحان بيه ولكن ديما شارد وغير كيفكر كنسولو مالك كيقولي والو وليت غير نهدر معاه عادي ينويها فشكل اخر وانا دغيا كنتعصب ونبقا نغوت واحد نهار تناقشنا وانا نجمع حوايجي وهو يجي وبقا كيضرب فيا علاش كتجمعي حوايجك وكيضرب وكنعطيها غير البكا مكنعرفش علاش ولا كيتصرف معايا بحال هكدا وفاش كيبرد كيجي عندي وكيبقا يبكي ويطلبني منتخلاش عليه ونسمحليه ايوا داكشي الي كندير مع انني كنت ضد نجلس معا راجل يضربني حتا حد مبقا كيتضرب هاد الوقت فين ما يوقع شي مشكيل يصرفقني ويضربني مع انو شخصيتو قوية مشي ضعيفة وفالاول كنا كنحلو مشاكلنا بالنقاش ماشي بالعنف دابا انا وليت خايفة كيقولي الى مشيتي وخليتيني غادي نرتاكب شي جريمة اخر مرة جمعت حوايجي وكنت جاية لدارنا انا ولدي قاليا حطي الولد وسيري بوحدك قلت ليه ولدي منتفرقش عليه جاب سكين وقاليا نموتو بثلاتة بينا انا وليت كنموت بالخلعة وكنطلب فيه ونزاوك ونبوس ليه يدو وليت عايشة فالرعب وملي كيبرد كيبقا يبوس ليا فيدي ويقوليا سمحلي ديري فيا الي بغيتي ويبقا يبكي انا دابا كنخاف منو فاش كنقولو علاش كتبقى تهددني كيبقا يضحك ويقولي غير كنخلعك باش معمرك تفارقي معايا عاونوني اشنو ندير هداك الحب كلو الي كان تبخر كنت كنقول انا عندي الزهرحيت لقيت راجل بحال هكا ودابا كنبقى نقول ياربي تلطف بيا انا معمري عاودت لدارنا على هادشي بغيتكم نتوما تلقاو ليا شي حل وربي يعطيكم متمنيتو

مصدر المشكل مطروح في الصفحة الرسمية للموقع عبر الفيسبوك

https://www.facebook.com/StonBook.Office.Site