أمسكت به أكثر من مرة وهو على علاقة بزميلة في العمل .. ولكنه قادر على التبرير دائماً

أمسكت به أكثر من مرة وهو على علاقة بزميلة في العمل .. ولكنه قادر على التبرير دائماً

الكاتب: ذ.مصطفى

السلام عليكم 

أنا عندي مشكله ويا ريتك تساعدني فيها 

مشكلتي مع زوجي زوجي يشتغل في مجال صحي والمشكله انه يكلم بنات اللي معاه بالدوام

طيب يكلم زميلاته في الدوام  قلنا ما عليه.. بس توصل المسأله اني اصيد عليه حاجات مو طبيعيه مثل الملاطفه هذا شيء ما ينسكت عنه

وكذا مرره افتح معاه السالفه يقول لي ان جالس يحل مشاكلهم  

شيء يضحك صح دكتور؟؟!! يحل مشاكل زميلاته بالدوام

ليه زميلاته ما عندهم أهل ولا سند!!

وكل مره يطلع لي بسالفه جديده

وهذه بعض الاشياء اللي صدتها عليه مع اني وربي مو مقصره بحقه في شيء :

1ـ حاط رمز قفل لجواله وفي مره من المرات عرفت الرمز السري وفتحته بدون ما يدري ولقيت ان يكلم في الوات ساب بنت وجالس يلاطفها بكلام الحب والعشق لا وراسل لها مسج اول ما صحى مكتوب فيه (عمري صحيتي)؟!!! ولمن اكتشف اني اعرف الرمز السري غيره يعني حركته تدل ان مخبي عني شيء ما يبني اعرفه 

2ـ مره من المرات لقيت في سيارته جايب إجازه مرضيه لنفس البنت اللي جالس يكلمها مع ان مو معاه في الدوام 

3ـ لقيت بعد من نفس البنت انها راسله سيرتها الذاتيه عبر هوتميله وتبي يترجمها بالانجليزي .. من قل المحلات اللي يترجمون  

4ـ مسجل اسم هذه البنت بإسم صاحبه وهذه أكبر دليل على انه له علاقه معاها 

5ـ كثير يجيب هدايا للبيت ويقول هذا من عند فلان من اصحابه وانا اشك بالموضوع ..لاني اعرف اصحابه وكلهم ع قدهم 

6ـ هذه توها صايره تاريخ .... تخيلي دكتوره كنا بالسياره ونزل زوجي يأخذ شغله من السوبرماركت وقام ولدي يناقز ع كرسي السياره تبع ابوه وفجأه اطلع فوق سير حزام الامان الا فيه بطايق مخبيهم بطاقتين صراف وبطاقه بنك فيها معلومات البنت، ماعرفت شلون اتصرف واخذتهم، واليوم اللي بعده فتحت معاه السالفه وقال ان البنت تبي تودع فلوسها من الراجحي لبنك الرياض وان سواقها اهو اللي جابهم له، طيب ليش اهي ماراحت بنفسها البنك؟؟!! الشغله تحير 

تكفين دكتوره قولي لي وش اسوي

كثير قعدت معاه وفتحت له المواضيع ودائما يقنعني بكلام انا مااقتنع منه لان كل مره يطلع لي بسالفه

والف شكر عزيزتي لج ولجهودك المبذوله 

دمتي مع خالص إحترامي 

المصدر :  صحيفة بانوراما